الطريق الصحراوي – الكيلو ~ ٥٠

بقايا الcappuccino على أسنان مضايقني، بحب أحافظ على أسناني بيضاء، لو سبت الcappuccino عليها هيعمل stains..

لكن معايا لبان Trident، لو أخدت لبانة هتشيل بقايا الكابوشينو وبكدة أبقى حافظت على أسناني بيضاء جميلة.

لكن ماذا لو عاملت قلبي بنفس العناية والأهتمام التي أعامل بها أسناني؟ كان سيظل قلبي أبيضاً نظيفاً طوال اليوم.

عادة أول سؤال الناس بتسألهولي لما يعرفوا أن عندي عيادة أسنان هو: عندك تبييض أسنان؟ طيب بكام؟ ياه، بس هيفرق جامد صح؟

الموضوع دا لاحظته اوي، حلم كتير من المرضى اللي بقابلهم سواء ولد او بنت، شاب او عجوز، هو أن أسنانهم ترجع ناصعة البياض زي صورهم زمان وهما صغيرين.

لما بدأت أتأمل في العلاقة اللي بين القلب والأسنان فهمت قول الله تعالى: سَنُرِيهِمْ آيَاتِنَا فِي الآفَاقِ وَفِي أَنفُسِهِمْ حَتَّى يَتَبَيَّنَ لَهُمْ أَنَّهُ الْحَقُّ أَوَلَمْ يَكْفِ بِرَبِّكَ أَنَّهُ عَلَى كُلِّ شَيْءٍ شَهِيدٌ – فصّلت/٥٣

شيوخ كتير ممكن يكلمونا عن بياض وأسوداد القلب، لكن كلامهم عادة بيكون صعب وتقيل. لكني بتدبري لبياض الأسنان وأصفرارها قدرت أفهم الموضوع بسهولة ووضوح.

مرة الحوار دا دار بيني وبين مريضة عندي:

المريضة: دكتور، لو عايزة أغطي أسناني كلها بlaminates، هتتكلف حوالي قد إيه؟

أنا: حضرتك عايزة تعملي laminates ليه؟ 

المريضة: عشانتبقى بيضاء..

أنا: طيب ما أنتي لسة عاملة bleaching؟

المريضة: ما أنت يا دكتور قلتلي أن الbleaching بيروح مع الوقت، لكن أنا صاحبتي عملت laminates ودي لونها مبيروحش مع الوقت.

معروف أن الbleaching (تبييض الأسنان) و الlaminates (تغطية الأسنان بقشور من السراميك) هما من أغلى الحاجات اللي ممكن الواحد يعملها عند طبيب الأسنان، لكن رغم كدة المريضة دي مكنش عندها مشكلة أنها تدفع مبلغ كبير عشان تعمل bleaching، المهم أسنانها ترجع بيضاء زي زمان، مش بس كدة، وإنما كانت مستعدة تدفع مبلغ ضخم وتغطي كل أسنانها بlaminates عشان طموحها أن أسنانها تفضل بيضاء طول عمرها.

طبعاً لآداب المهنة فهمتها أن السنة اللي ربنا خلقها أحسن ملايين المرات من أي laminates ممكن يعملهلها أحسن دكتور في العالم، لكن المشكلة أن إحنا مش بنعرف نتعامل مع أسنانا صح عشان تفضل بيضاء وسليمة، زي ما بالضبط مابنعرفش نتعامل مع قلبنا صح عشان يفضل أبيض وسليم.

طيب عشان نفهم إزاي نتعامل مع أسنانا صح خلينا الأول نفهم إزاي أسنانا لونها بيتغير وبعد ما بتكون بيضاء وجميلة بتتحول تبقى صفراء وكئيبة؟

السبب في كدة الstains بتاعة بقايا الشراب والطعام. زي مثلاً لما بنشرب Pepsi، شاي، او كابتشينو؛ الأسنان البيضاء بتمتص بقايا اللون الأسود وبيثبت عليها فبيخلي لونها يصفر. دا في الأسنان، ولو تأملنا الموضوع في القلب هنلاقي تشابه كبير..

يقول النبي صلى الله عليه وسلّم:

تُعرض الفتن على القلوب كالحصير عوداً عوداً (يعني المسلم في حياته بيقابل فتن كتير، فتنة ورا فتنة)

فأي قلب أشربها نُكت فيه نُكتة سوداء (فإذا المسلم أستجاب للفتن دي بتسيب في قلبه نقطة سوداء)

وأي قلب أنكرها نُكت فيه نُكتة بيضاء (وإذا المسلم ثبت على الحق بتسيب في قلبه نقطة بيضاء)

حتى تصير القلوب على قلبين: (لحد ما قلوب الناس تبقى حاجة من أتنين:)

على أبيض مثل الصفا فلا تضره فتنة ما دامت السماوات والأرض.. (أول نوع قلب أبيض مثل الصفا لا تفتنه فتنة ما دامت السماوات والأرض)

والآخر أسود مرباداً (شديد السواد) كالكوز مجخياً (زي الكوز المقلوب) لا يعرف مَعروفاً ولا ينكر منكراً إلا ما أشرب من هواه (مفيش عنده حلال وحرام إلا اللي بيوافق هواه)

وعشان كدة في guidelines ضرورية بنصح بيها المرضى اللي بيجولي عشان أسنانهم تفضل بيضاء وسليمة، وزيها في guidelines ضرورية لأي حد عايز قلبه يفضل أبيض وجميل..

مثلأً لازم نغسل أسناننا بالفرشاة مرتين يومياً، منهم مرة قبل النوم، ومينفعش نأخر غسيل الأسنان عن معاده وإلا الأسنان هتبدأ تصفر – كذلك القلب، لازم نغسله ٥ مرات في اليوم في الصلاوات الخمسة، وبرضه مينفعش نأجل غسيل القلب عن معاده وإلا القلب هيبدأ يسود..

كمان أغلب الناس بتغسل أسنانها غلط او بتكروتها بسرعة. طبعاً دا مينفعش، لازم نغسل أسناننا بالطريقة الصحيحة وبتركيز وهدوء وتأني – كذلك في الصلاة، مينفعش نكروت الصلاة وإلا هتبقى بدون لازمة ومش هتنضف القلب، لازم نصلي بالطريقة الصحيحة وبتركيز وهدوء وتأني..

برضه مينفعش ناكل اي حاجة بين الوجبتين، ولو أكلنا لازم نتمضمض لحد ما يجيي معاد الوجبة التانية اللي بعدها بنغسل أسنانا – وكذلك في القلب، مينفعش نعمل ذنوب بين الصلاة والصلاة، ولو عملنا ذنوب لازم نستغفر..

عادي جداً ممكن ناكل حلويات براحتنا ما دمنا بنغسل أسنانا بانتظام – وكذلك في القلب، ممكن نعمل مباحات وترفيه حلال براحتنا ما دمنا بنصلي بانتظام..

ورغم أن الحلويات مش مضرة في ذاتها إلا أننا إذا أكلناها ومغسلناش أسنانا في مواعيد الغسيل أسنانا هتتضرر – وكذلك في القلب، لو إحنا عملنا مباحات وترفيهات حلال كتير بدون ما نصلي المباحات والترفيهات الحلال دي هتبقى أسمها “ترف”، وتكون سبب في أسوداد القلب مش راحته..

أخيراً المخدرات والخمور ممنوعين منعاً باتاً لأنهم بيخربوا الأسنان واللثة وممكن يسببوا سرطان الفم.. – كذلك المخدرات والخمور ممنوعين منعاً باتاً لأنهم بيغيبوا العقل وبيموتوا القلب..

وعن أبي هريرة رضي الله عنه أن النبي صلى الله عليه وسلم سأل أصحابه:

أرأيتم لو أن نهراً بباب أحدكم يغتسل منه كل يوم خمس مرات، هل يبقى من درنه شيء؟ (يعني: شوفتوا لو في واحد قدام باب بيته نهر بيستحمى فيه كل يوم خمس مرات، هل يبقى من وساخته شيء؟)

قالوا: لا يبقى من درنه شيء!!

قال: فذلك مثل الصلوات الخمس يمحو الله بهن الخطايا..

للأسف أخدني الاهتمام بالجمال الظاهر عن جمال الباطن. محتاج أهتم بقلبي زي ما بهتم بأسناني.